İTV-nin Yayım Şurasına yeni üzvlər seçilib

Milli Məclis İctimai Televiziya və Radio Yayımları Şirkəti Yayım Şurasına yeni üzvlərin seçilməsini təsdiqləyib. 

İclas zamanı “İctimai Televiziya və Radio Yayımları Şirkəti Yayım Şurasının üzvlüyünə namizədlikləri irəli sürülmüş şəxslərin seçilməsi” məsələsi müzakirəyə çıxarılıb. Qeyd edilib ki, idman federasiyaları tərəfindən Azərbaycan Cüdo Federasiyasının İcraçı vitse-prezidenti Rəşad Rəsullu, şahmat üzrə qadınlar yığma komandasının kapitanı İlahə Qədimova namizəd göstərilib.

Dini konfessiyalar tərəfindən Qafqaz Müsəlmanları İdarəsi sədrinin birinci müavini Salman Musayev və Qafqaz Müsəlmanları İdarəsinin Aparat rəhbəri Simran Həsənov namizəd kimi təqdim olunub.

Yaradıcılıq təşkilatları tərəfindən isə Bəstəkarlar İttifaqının İdarə heyətinin üzvü Həcərxanım Babayeva və Azərbaycan Milli Konservatoriyasının dosenti Aytən Babayeva irəli sürülüb.

Səsvermə nəticəsində Rəşad Rəsullu, Salman Musayev və Həcərxanım Babayeva Yayım Şurasının üzvləri seçiliblər. Şuranın üzvlərinin səlahiyyət müddəti 6 ildir.

Qərar layihəsi müzakirələrdən sonra səsə qoyularaq bir oxunuşda qəbul edilib. Ekspertlər bildirirlər ki, Yayım Şurasının yeni tərkibi İctimai Televiziya və Radio Yayımları Şirkətinin fəaliyyətinin şəffaflığı və yaradıcı yanaşmaların gücləndirilməsi baxımından strateji əhəmiyyət daşıyır.