Azərbaycan və Səudiyyə Ərəbistanı ali və peşə təhsili üzrə əməkdaşlığı genişləndirir

Azərbaycanın elm və təhsil naziri Emin Əmrullayevin rəhbərlik etdiyi nümayəndə heyəti Səudiyyə Ərəbistanı Krallığının təhsil naziri Yusif bin Abdullah əl-Binyanın dəvəti ilə bu ölkəyə rəsmi səfər edib.

Səfər çərçivəsində Emin Əmrullayev və Yusif bin Abdullah əl-Binyan arasında keçirilən görüşdə ali təhsil və peşə təhsili sahələrində mövcud əməkdaşlıq, eləcə də yaxın dövrdə reallaşdırılması planlaşdırılan birgə təşəbbüslər müzakirə olunub. Tərəflər tələbə və müəllim mübadiləsi, birgə proqramlar və təhsil idarəçiliyi üzrə təcrübə paylaşımının genişləndirilməsi imkanlarını dəyərləndiriblər.

Nümayəndə heyəti həmçinin Kral Səud Universitetini ziyarət edib. Universitetin rektoru Ali Masmali ilə görüşdə Azərbaycanın ali təhsil müəssisələri ilə akademik və elmi əməkdaşlıq perspektivləri, o cümlədən birgə tədqiqatlar və proqramların yaradılması ətrafında fikir mübadiləsi aparılıb.

Səfər zamanı Kral Əbdüləziz Elm və Texnologiya Şəhərinə də baxış keçirilib. Burada nümayəndə heyəti müasir laboratoriyalar, inkubasiya mərkəzi və innovasiya ekosistemi ilə tanış olub. Emin Əmrullayev və qurumun prezidenti Munir Eldesouki arasında keçirilən görüşdə elm, innovasiya və texnologiya transferi üzrə əməkdaşlıq imkanları müzakirə edilib.

Rəsmi Bakı bu səfəri təhsil və innovasiya sahələrində regional tərəfdaşlığın dərinləşdirilməsi istiqamətində mühüm addım kimi qiymətləndirir.