"Bu almalar sənin deyil" deyən məmurla bağlı icra başçısı yeni qərar verib

Sumqayıt Şəhər İcra Hakimiyyətində (ŞİH) aparılan struktur dəyişiklikləri çərçivəsində şəhər ərazisində qanunsuz küçə ticarətinə qarşı keçirilən reydlər zamanı tanınan əməkdaş Samir Bədəlovun vəzifəsi dəyişdirilib.

İqtisadiyyat.az-ın əldə etdiyi məlumata görə, bununla bağlı icra başçısı Zakir Fərəcov müvafiq əmr imzalayıb. Struktur islahatları nəticəsində ŞİH-in İstehsal və xidmət sahələri sektoru ləğv edilib və həmin sektorda Baş məsləhətçi vəzifəsində çalışan S.Bədəlov vəzifəsini itirib.

Eyni zamanda, icra hakimiyyətində yeni yaradılan Sosial-iqtisadi və memarlıq-tikinti məsələləri şöbəsinin Memarlıq-tikinti məsələləri sektoruna Baş məsləhətçi təyinatı həyata keçirilib. Müvafiq əmrə əsasən, Samir Bədəlov yeni strukturda fəaliyyətini davam etdirəcək.

Rəsmi məlumata görə, dəyişikliklər yerli icra hakimiyyəti orqanlarında idarəetmənin optimallaşdırılması və funksional səmərəliliyin artırılması məqsədi daşıyır.