Azərbaycan vətəndaşlarından Ukraynaya enerji avadanlıqları üzrə humanitar yardım göndərilib

Azərbaycan vətəndaşları Ukraynaya humanitar yardım çərçivəsində enerji avadanlıqları göndəriblər. Bu barədə Ukraynanın Bakıdakı səfiri Yuri Qusev bildirib.

Səfirin sözlərinə görə, humanitar yük Ukraynanın xarici işlər naziri Andrey Sibiqanın təşəbbüsü olan “Ukrayna üçün istilik” proqramı çərçivəsində göndərilib. Yardım Ukrayna Dövlət Fövqəladə Hallar Xidməti və bir sıra ərazi icmalarına təhvil veriləcək.

Göndərilən avadanlıqlar arasında müxtəlif gücə malik 17 generator, dörd portativ enerji təchizatı sistemi və üç hava qızdırıcısı var. Onlar Rusiya zərbələri nəticəsində zərər görmüş regionlarda elektrik və istilik təminatının operativ bərpası üçün istifadə olunacaq.

Qusev Azərbaycan vətəndaşlarına, müəssisələrinə və ali rəhbərliyinə dəstəyə görə təşəkkürünü bildirib və yardımın Ukrayna üçün həmrəylik və qardaşlıq nümunəsi olduğunu vurğulayıb.