MŞ: “İdrak” liseyi ilə bağlı hadisədə jurnalist etikası pozulub

“İdrak” liseyində baş vermiş insident ictimai maraq doğursa da, media mənsublarının hadisə ilə bağlı məktəbin şagirdindən açıqlama alma və həmin məlumatları yayma üsulları yolverilməzdir.

Bu barədə Mətbuat Şurasının yaydığı bəyanatda bildirilib. 

Bəyanatda vurğulanıb ki, sözügedən hallar “Azərbaycan Jurnalistlərinin Etik Davranış Qaydaları”na tam ziddir. Xüsusilə, qaydaların “Şərəf və ləyaqətin qorunması, şəxsi həyatın toxunulmazlığı” adlı 3-cü prinsipinin 3.9-cu bəndinə istinad edilib. Həmin bəndə əsasən, jurnalistlər uşaqların hüquqlarına hörmətlə yanaşmalı, valideynlərinin və ya qanuni nümayəndələrinin icazəsi olmadan onlardan müsahibə götürməməlidirlər.

Qeyd olunub ki, ictimai əhəmiyyət kəsb edən istisna hallar xaric, uşaqların şəxsi həyatı ilə bağlı məlumatların və fotoşəkillərin dərcinə yol verilməməlidir. Həmçinin faciə və ya cinayət hadisələrinə cəlb edilmiş uşaqların kimliyinin qorunması məcburidir.

Mətbuat Şurası bildirib ki, “İdrak” liseyi ilə bağlı yayımlanan materiallarda bu tələblərə əməl edilməyib. Şagirdlə aparılan müsahibə və müsahibə zamanı nümayiş etdirilən davranışlar etik qaydaların “Jurnalistin özünün və çalışdığı orqanın reputasiyasının qorunması” adlı 5-ci prinsipinin də pozulması kimi qiymətləndirilib.

Bəyanatda vurğulanıb ki, “ictimai əhəmiyyət” anlayışı “ictimaiyyət üçün maraqlı” informasiya ilə qarışdırılmamalıdır və sözügedən media fəaliyyəti hadisənin obyektiv mahiyyətinin üzə çıxarılmasına xidmət etməyib.

Mətbuat Şurası jurnalistləri cəmiyyətdə rezonans doğuran və həssas hadisələrin işıqlandırılmasında emosionallıqdan, tələskənlikdən çəkinməyə, peşəkar məsuliyyət nümayiş etdirməyə çağırıb.

“Unutmaq olmaz ki, həssaslıq ən böyük peşəkarlıq meyarıdır və yalnız bu yanaşma medianın cəmiyyətin informasiya tələbatını ödəməsinə imkan verir,” –  bəyanatda qeyd olunub.