Azərbaycanda sığortalanan kənd təsərrüfatı heyvanlarının sayı iki dəfədən çox artıb

2025-ci ilin yekunları üzrə sığortalanan kənd təsərrüfatı heyvanlarının sayı 6 935 başa çatıb ki, bu da 2024-cü illə müqayisədə 2,1 dəfə çoxdur. Bu barədə Dövlət Sığorta Fondundan bildirilib. 

2024-cü ildə aqrar sığorta mexanizmi vasitəsilə 3 276 baş iri və xırda buynuzlu heyvan sığortalanmışdı.

Aqrar sığorta mexanizmi çərçivəsində əkin sahələri ilə yanaşı, südlük və ətlik iribuynuzlu mal-qara, eləcə də xırdabuynuzlu heyvanlar sığorta olunur. Dövlət fermerlərə dəstək məqsədilə sığorta haqqının 50%-ni öz üzərinə götürür.

Mövcud tariflərə əsasən, 1 000 manatlıq iribuynuzlu mal-qaranın sığortalanması fermerə 24–39 manat, 300 manatlıq xırdabuynuzlu heyvanların sığortalanması isə 7–10 manat təşkil edir.

2025-ci ildə heyvandarlıq sığortası üzrə toplanan sığorta haqları 2,5 dəfə artaraq 4,7 milyon manata yüksəlib. Eyni dövrdə heyvandarlıq təsərrüfatlarına təqdim edilən sığorta təminatı 46 milyon manatı keçib, bu da 2024-cü illə müqayisədə 2,3 dəfə çoxdur.

Ötən il müxtəlif risklər nəticəsində zərər çəkmiş fermer və təsərrüfatlara 394 min manat sığorta ödənişi həyata keçirilib. Ən çox ödənişlər yoluxucu xəstəliklər, yemdən zəhərlənmə və vəhşi heyvanların hücumları ilə bağlı qeydə alınıb.

Aytac Zeynalova