Torpaqların idarə olunmasında pozuntular aşkar olunub

Aparılan təhlillər bələdiyyələrdə yol verilən əsas pozuntuların torpaqların idarə olunması, maliyyə vəsaitlərindən istifadə, şəffaflıq və hesabatlılıq sahələrinə aid olduğunu göstərir. Bu barədə Ədliyyə Nazirliyi bələdiyyələrin fəaliyyətinə dair 2025-ci il üzrə illik məruzəsində bildirib.

Məruzəyə əsasən, bələdiyyələrin özünüidarəetmə fəaliyyətində aşkar edilən nöqsanlar arasında saxta sənədlərin hazırlanması, bələdiyyə mülkiyyətində olan torpaq sahələrinin saxta sənədlər əsasında satılması, bələdiyyə əmlakı barədə qərarların səlahiyyət həddinin aşılması ilə verilməsi, eləcə də bələdiyyə torpaqlarının istifadəsi və mühafizəsi üzrə nəzarət tədbirlərinin həyata keçirilməməsi xüsusi yer tutur.

Hesabatda qeyd olunub ki, bəzi hallarda bələdiyyə əmlakının mənimsənilməsi və ya israf edilməsi, torpaq sahələrinin bazar qiymətindən xeyli aşağı qiymətlə satılması, habelə hərrac və müsabiqə mexanizmlərinin formal xarakter daşıması faktları da aşkar edilib.

Ədliyyə Nazirliyinin məlumatına görə, vəzifəli şəxslərin səhlənkarlığı nəticəsində yerli vergilər və ödənişlərin, o cümlədən icarə haqlarının toplanması aşağı səviyyədə təşkil olunub, bu isə bir sıra bələdiyyələrin maliyyə vəziyyətinin pisləşməsinə səbəb olub.

Vətəndaş şikayətlərinin təhlili göstərib ki, Bakı şəhəri üzrə əsas şikayətlər qanunsuz torpaq ayrılması, vergi və ödənişlərin düzgün hesablanmaması, abadlaşdırma və yaşıllıqların mühafizəsi üzrə öhdəliklərin yerinə yetirilməməsi ilə bağlıdır. Regionlarda isə şikayətlər əsasən torpaqların qanunsuz istifadəsi, icra müddəti bitmiş sahələrin geri qaytarılmaması və dəymiş ziyanın ödənilməməsi ilə əlaqədar olub.

Məruzədə bildirilib ki, aşkar edilmiş hüquq pozuntularının qarşısının alınması məqsədilə bələdiyyələrə torpaq idarəçiliyi, yerli büdcənin tərtibi, maliyyə vəsaitlərindən istifadə, şəffaflığın artırılması və daimi komissiyaların fəaliyyətinin gücləndirilməsi ilə bağlı tövsiyələr verilib.

Gülnar Nazimqızı