Deputat bələdiyyələrdə könüllülük hərəkatının yaradılmasını təklif edir

Milli Məclisin deputatı Aydın Mirzəzadə bələdiyyələrin fəaliyyətinə ictimai iştirakçılığın artırılması məqsədilə könüllülük mexanizminin yaradılmasını təklif edib.

Mirzəzadə bildirib ki, hazırda ölkədə müxtəlif sahələr üzrə könüllülük təcrübəsi mövcuddur və bu model bələdiyyələrə də tətbiq oluna bilər. Onun sözlərinə görə, tələbələr, eləcə də yaşından asılı olmayaraq ictimai fayda vermək istəyən şəxslər bu prosesə cəlb edilməlidir.

“Ayrı-ayrı sahələr üzrə könüllülük var. Bələdiyyələr üzrə də könüllü olanlar bu prosesə cəlb olunsun. Məsələn, tələbələr və ya 70 yaşında olub kömək etmək istəyən insanlar. Onların bu prosesdə iştirakı təmin edilməlidir”, – deputat qeyd edib.

Aydın Mirzəzadə vurğulayıb ki, bələdiyyələrdə könüllülük hərəkatının formalaşdırılması həm yerli idarəetmədə vətəndaş iştirakını gücləndirə, həm də bələdiyyə institutuna ictimai marağı artıra bilər.

Gülnar Nazimqızı