Elvin Abbasov: süni intellektdə hədəf istehsalçı ölkə olmaqdır

İKT üzrə ekspert Elvin Abbasov hesab edir ki, Azərbaycan süni intellekt məsələsinə yalnız texnoloji trend kimi deyil, strateji seçim kimi yanaşmalıdır.

Onun sözlərinə görə, əsas sual budur: Azərbaycan süni intellekt sahəsində istehlakçı ölkə olacaq, yoxsa istehsalçı? Bu hədəf dəqiq müəyyənləşdirilməli və dövlət səviyyəsində koordinasiyalı şəkildə idarə olunmalıdır.

Abbasov bildirib ki, əgər ölkədə bu sahənin güclü elmi bazası formalaşmasa, Azərbaycan digər ölkələrin elmi və texnoloji məhsullarından istifadə edən, onlardan asılı vəziyyətdə qalan ölkəyə çevrilə bilər. 

Bu səbəbdən, süni intellekt istiqamətində bütün asılılıq faktorları – texnoloji, proqram təminatı, infrastruktur və insan kapitalı baxımından – düzgün təhlil edilməlidir.

Ekspert vurğulayıb ki, Azərbaycan enerji ölkəsi kimi əlavə üstünlüklərə malikdir.

 Doğru strategiya seçildiyi təqdirdə, enerji resursları və rəqəmsal transformasiya imkanlarının sintezi müsbət nəticələr verə bilər.

Onun fikrincə, elmin real təsir gücü olması üçün tədqiqat nəticələri praktik tətbiqə yönəlməlidir.

 "Azərbaycan elmini biznes mühitində görmək vacibdir. Bunun üçün universitetlərlə biznes strukturları arasında sıx əməkdaşlıq mexanizmləri qurulmalı, innovasiyaların kommersiyalaşdırılması təşviq edilməlidir", - o bildirib.

Abbasov əlavə edib ki, süni intellekt sahəsində uğur yalnız texnologiyanın alınması ilə deyil, milli elmi məktəbin, tətbiqi innovasiyaların və koordinasiyalı idarəetmə modelinin formalaşdırılması ilə mümkündür.

Gülnar Nazimqızı