Milli Məclis Avropa Şurasının "İnsan orqanlarının alverinə qarşı Konvensiya"sını ratifikasiya edib

Azərbaycan Milli Məclisi Avropa Şurasının 2015-ci il tarixli “İnsan orqanlarının alverinə qarşı Konvensiya” sənədini ratifikasiya edib. Konvensiya insan orqanlarının alverinin qarşısının alınması, qurbanların hüquqlarının qorunması və milli-beynəlxalq əməkdaşlığın gücləndirilməsi məqsədini daşıyır.

Sənəddə qanunsuz götürülmüş orqanların hazırlanması, saxlanması, daşınması, ötürülməsi və idxalı-ixracı, həmçinin donor və resipientin qanunsuz cəlbi ilə bağlı cinayət məsuliyyəti müəyyən edilib. Eyni zamanda, köməklik, təhrikçilik və cəhd halları da əhatə olunur.

Konvensiyada həmçinin cinayətlərin istintaqı, qarşılıqlı hüquqi yardım, ekstradisiya, cinayət nəticəsində əldə olunmuş gəlirlərin müsadirəsi, zərərçəkmişlərin və şahidlərin müdafiəsi ilə bağlı müddəalar yer alıb.

Qanun layihəsinə əsasən, Konvensiyanın müddəaları Ermənistanla Azərbaycan arasında münasibətlər normallaşana qədər tətbiq edilməyəcək.

Gülnar