FHN Novruz çərşənbələri ilə bağlı yanğın təhlükəsizliyi qaydalarını açıqlayıb

Fövqəladə Hallar Nazirliyi Novruz çərşənbələri zamanı yanğın təhlükəsizliyi qaydalarına əməl olunması ilə bağlı əhaliyə müraciət edib.

Nazirlik bildirir ki, bayram tonqalları yaşayış evlərindən, avtomobillərdən, elektrik naqillərindən, ağaclardan və digər yanar əşyalardan uzaqda yandırılmalıdır. Azyaşlılar tonqal ətrafında yalnız böyüklərin nəzarəti altında olmalı, tonqal üzərindən atılarkən ehtiyatlı davranılmalıdır.

Qurum tonqalın tam sönənədək nəzarətdə saxlanılmasının, eləcə də süfrələrdə yandırılan şamların nəzarətsiz buraxılmamasının vacibliyini vurğulayıb.

Nazirlik küləkli hava şəraitində tonqal yandırılmasının xüsusilə təhlükəli olduğunu qeyd edərək, vətəndaşları yanğın təhlükəsizliyi qaydalarına ciddi riayət etməyə çağırıb.