Mədəniyyət Nazirliyi festivalda qalib gələn uşaqların pul mükafatını niyə gecikdirir? - Açıqlama

Mədəniyyət Nazirliyinin təşkilatçılığı ilə keçirilən Uşaq İncəsənət Festivalı qalibləri onlara ayrılan vəsaitin hələ də köçürülmədiyini bildiriblər. Bu barədə anews.az-a qalib iştirakçıların valideynləri müraciət edib.

Valideynlər deyir ki, 2023-cü il festivalında ödənişlər tədbirdən iki gün sonra həyata keçirilmişdi, lakin bu il iki ay keçməsinə baxmayaraq nazirlikdən konkret cavab və ödəniş alınmayıb.

Valideynlər həmçinin festivalın rəsmi Instagram səhifəsində ödəniş gecikməsindən narazılıqlarını ifadə ediblər.

Mədəniyyət Nazirliyi anews.az-a açıqlamasında bildirib ki, qaliblərin ödənişləri mərhələli şəkildə həyata keçirilir.

"Uşaq İncəsənət Festivalı çərçivəsində qalib olmuş iştirakçılara nəzərdə tutulan pul mükafatlarının ödənişi artıq həyata keçirilməkdədir. Hazırda köçürmələr qaliblərin valideynləri tərəfindən təqdim edilmiş müvafiq sənədlər əsasında onların bank hesablarına mərhələli şəkildə həyata keçirilir. Ümumilikdə 512 qalibin olması səbəbindən ödəniş prosesi ardıcıl şəkildə təşkil olunmuşdur və yalnız sənədlərini tam şəkildə təqdim etmiş şəxslər üzrə köçürmələr icra edilir. Eyni zamanda, ilin əvvəlində büdcə vəsaitlərinin açılması və maliyyə prosedurlarının tamamlanması, habelə təqdim edilmiş sənədlərin düzgünlüyünün yoxlanılması müəyyən vaxt tələb edib. Hazırda proses davam edir və sənədlərini təqdim etmiş bütün qaliblərə ödənişlərin tam şəkildə çatdırılması təmin olunacaq", - açıqlamada deyilir. 

Uşaq İncəsənət Festivalında 3 nominasiya üzrə qaliblər olub. Birinci yerin qalibi üçün min manat, ikinci yer üçün 500 manat, üçüncü yer üçün isə 400 manat nəzərdə tutulub. 

Gülnar Nazimqızı