Azərbaycan və Türkiyə Preferensial Ticarət Sazişinin əhatəsini genişləndirəcək

Azərbaycan ilə Türkiyə arasında imzalanmış Preferensial Ticarət Sazişinin əhatə dairəsinin genişləndirilməsi barədə razılıq əldə olunub.

Bu barədə Mikayıl Cabbarov sosial şəbəkə hesabında məlumat verib. Onun sözlərinə görə, məsələ Gürcüstan–Azərbaycan–Türkiyə biznes-forumu çərçivəsində Ömər Bolat ilə keçirilən görüşdə müzakirə olunub.

Nazir bildirib ki, tərəflər iqtisadi tərəfdaşlığın dərinləşdirilməsi, ticarət dövriyyəsinin və investisiyaların davamlı artırılması, biznes əlaqələrinin təşviqi üçün hüquqi bazanın təkmilləşdirilməsi məsələləri üzrə fikir mübadiləsi aparıblar.

Görüşdə həmçinin enerji, sənaye istehsalı, nəqliyyat, logistika, turizm və digər sahələrdə qarşılıqlı fəaliyyətin genişləndirilməsi imkanları müzakirə edilib.