MN: 1 nömrəli səfərbərlik Silahlı Qüvvələrin tam döyüş hazırlığı deməkdir

İranın Naxçıvana dron hücumundan sonra keçirilən Təhlükəsizlik Şurasının iclasında Prezident İlham Əliyev Silahlı Qüvvələrin istənilən əməliyyatı həyata keçirməyə hazır olmalı olduğunu bildirib.

“Bizim Silahlı Qüvvələrimiz – Müdafiə Nazirliyi, Dövlət Sərhəd Xidməti və digər bütün Xüsusi Təyinatlı Qüvvələr bir nömrəli səfərbərlik vəziyyətinə gətirilib və istənilən əməliyyatı keçirməyə hazır olmalıdırlar”, – dövlət başçısı qeyd edib.

Bununla bağlı Müdafiə Nazirliyi sosial şəbəkə hesabında “1 nömrəli səfərbərlik” hərbi termininin izahını yayıb.

Nazirliyin məlumatına görə, “1 nömrəli səfərbərlik” silahlı qüvvələrin tam döyüş hazırlığı vəziyyətinə gətirilməsi deməkdir. Bu zaman ehtiyatda olan hərbi qulluqçuların çağırılması həyata keçirilir, hərbi hissələr isə döyüş mövqelərinə və ya təyin olunmuş ərazilərə çıxarılır.