Türkiyə və Azərbaycanla bağlı dezinformasiyalara qarşı ictimaiyyətə çağırış edilib

Türkiyə Prezident Administrasiyasının Kommunikasiyalar İdarəsinin Dezinformasiya ilə Mübarizə Mərkəzi sosial şəbəkələrdə Türkiyə–Azərbaycan münasibətləri və Azərbaycana qarşı təxribat xarakterli paylaşımların artdığını bildirib.

Qurum son günlər bölgədə baş verən hadisələr fonunda bəzi platformalarda həddi aşan tənqid və dezinformasiyanın yayıldığını qeyd edib.

Mərkəzin açıqlamasında bildirilir ki, tarixi bağlar və ortaq dəyərlərlə bir-birinə bağlı olan Türkiyə və Azərbaycan münasibətləri uzun illərdir strateji tərəfdaşlıq əsasında inkişaf edir və tərəflər keçmişdə də müxtəlif sınaqlardan birlikdə çıxıblar.

Qeyd olunub ki, Türkiyə Prezidenti Rəcəb Tayyib Ərdoğan və Azərbaycan Prezidenti İlham Əliyev tərəfindən liderlər səviyyəsində irəli aparılan münasibətlər bütün sahələrdə “bir millət, iki dövlət” prinsipi əsasında inkişaf etdirilir.

Mərkəz ictimaiyyəti iki ölkə arasındakı qardaşlıq münasibətlərinə zərər verə biləcək dezinformasiya və təxribat xarakterli məlumatlara qarşı həssas olmağa və rəsmi qurumların açıqlamalarına istinad etməyə çağırıb.