Azərbaycanda ötən il üzrə yolxucu xəstəliklərin dinamikası açıqlanıb

 Azərbaycanda 2025-ci ildə bir sıra yoluxucu xəstəliklər üzrə xəstələnmə göstəricilərində azalma qeydə alınıb. Bu barədə Nazirlər Kabinetinin illik hesabatında qeyd olunub. 

Ölkə əhalisi arasında kəskin bağırsaq infeksiyalarının yayılma səviyyəsi 2024-cü illə müqayisədə 6,4% azalaraq 8,7 min hadisədən 8,1 min hadisəyə düşüb.

Törədicisi müəyyən edilmiş enteritlərin yayılma səviyyəsi isə 1,9 dəfə azalaraq 2,7 min hadisədən 1,5 min hadisəyə enib.

Hesabatda qeyd olunur ki, viruslu hepatitlərlə bağlı ümumi xəstələnmə göstəricisi də əhəmiyyətli dərəcədə azalıb. Belə ki, bu göstərici əvvəlki illə müqayisədə 4,9 dəfə azalaraq 630 hadisədən 128 hadisəyə düşüb.

Hepatit A üzrə xəstələnmə 32 dəfə azalaraq 444 hadisədən 14 hadisəyə enib, Hepatit C üzrə xəstələnmə isə 2,8 dəfə azalaraq 138 hadisədən 50 hadisəyə düşüb.

2025-ci ildə ölkə üzrə 19 qarayara (antraks) hadisəsi qeydə alınıb ki, bu da 2024-cü illə müqayisədə üç hadisə azdır.

Hesabatda bildirilib ki, Ümumdünya Səhiyyə Təşkilatı tərəfindən Azərbaycana verilmiş “malyariyadan azad ölkə” statusunun qorunması məqsədilə 2022–2026-cı illəri əhatə edən yol xəritəsi çərçivəsində tədbirlər davam etdirilib. İl ərzində epidemioloji nəzarət məqsədilə malyariya diaqnostikası üzrə istinad laboratoriyasında 154,5 min qan nümunəsi müayinə olunub və yerli malyariya hadisəsi aşkar edilməyib.

Bununla yanaşı, ölkədə poliomielitdən azad ərazi statusunun qorunması istiqamətində də tədbirlər davam etdirilib.

Bu çərçivədə kəskin süst iflic hallarına epidemioloji nəzarət və immunizasiya səviyyəsinin qiymətləndirilməsi məqsədilə Göygöl, Yardımlı, Qəbələ, Ağdam, Zərdab, Yevlax, Tovuz, Samux, Qax və Oğuz rayonlarında monitorinqlər aparılıb.

Gülnar Nazimqızı