AzTV-də aparıcılara “pulsuz işləmək” təklif olunur - KİV

Azərbaycanda dövlət televiziyası olan Azərbaycan Dövlət Televiziyası rəhbərliyinin teleaparıcılara pulsuz işləmək şərti irəli sürdüyü iddia olunur.

Gununsesi.info-nun yaydığı məlumata görə, AzTV sədri Rövşən Məmmədov digər dövlət qurumlarında mətbuat və ictimaiyyətlə əlaqələr vəzifələrində çalışan aparıcılara seçim təqdim edib. Bildirilir ki, həmin şəxslərin AzTV-də fəaliyyətlərini davam etdirməsi üçün əsas şərt ictimai əsaslarla, yəni ödənişsiz işləmək olub.

Məlumata əsasən, bu təklif nəticəsində aparıcılar Namiq Əliyev, Ceyhun Səfər və Nərmin Xəlilova işdən ayrılıblar. Digər iki aparıcının isə təklifi qəbul etdiyi bildirilir.

Azərbaycan qanunvericiliyinə görə, bir şəxsin eyni vaxtda bir neçə iş yerində çalışmasına məhdudiyyət yoxdur və bu, həm ştat, həm də xidmət müqavilələri çərçivəsində mümkündür.

Məsələ ilə bağlı AzTV-nin İctimaiyyətlə Əlaqələr şöbəsi sorğuya cavab olaraq bildirib ki, qurumun kadr siyasəti daxili məsələdir və bu barədə açıqlama verilməsi məqsədəuyğun hesab edilmir. Qurumdan qeyd olunub ki, əməkdaşlar narazı olduqları hallarda birbaşa rəhbərliyə müraciət edə bilirlər.