Deputat təklif edir ki, minimum əməkhaqqı ilə orta maaş arasında fərq azaldılsın

Hazırda minimum əməkhaqqı orta aylıq əməkhaqqının 36,3%-nə bərabərdir ki, bu da qlobal səviyyədə daha optimal hesab edilən 55–60% göstəricisindən xeyli aşağıdır. Bunu deputat Vüqar Bayramov deyib. 

Bayramov qeyd edib ki, Avropa İttifaqına üzv olan yüksək gəlirli ölkələrdə minimum əməkhaqqı orta maaşın 60%-dən çoxunu təşkil edir.

Deputatın fikrincə, minimum və orta əməkhaqqı arasındakı fərqin azaldılması median əməkhaqqının artmasına və aşağı gəlirli işçilərin sosial müdafiəsinin güclənməsinə xidmət edə bilər.

O həmçinin bildirib ki, ölkədə minimum əməkhaqqının artırılması artıq ildə azı bir dəfə nəzərdən keçirilməsi qanunla təsbit olunub və bu mexanizm onun sistemli şəkildə tənzimlənməsinə imkan yaradır.

“Minimum əməkhaqqı artırılarkən orta maaşla nisbət nəzərə alınmalı və daha yüksək artımların tətbiqi məqsədəuyğundur,” – deputat əlavə edib.

Son statistikaya görə Azərbaycanda orta aylıq əməkhaqqı 1 099 manat təşkil edib.

Gülnar Nazimqızı