Keçmiş arvadını öldürüb, evini və maşınını yandırıb intihar edib

Bakı şəhərinin Binəqədi rayonunda fərdi yaşayış evində baş verən yanğın və iki nəfərin ölümü ilə bağlı cinayət işi başlanıb. Bu barədə Baş Prokurorluq və Fövqəladə Hallar Nazirliyi birgə məlumat yayıb.

Məlumata görə, hadisə aprelin 17-də saat 12 radələrində “Baksol yolu” adlanan ərazidə qeydə alınıb. Yanğının söndürülməsi üçün dərhal əraziyə Dövlət Yanğından Mühafizə Xidmətinin qüvvələri cəlb olunub və alovun geniş əraziyə yayılmasının qarşısı alınıb.

Yanğın nəticəsində 1968-ci il təvəllüdlü Rafət Həsənova məxsus 90 kvadratmetr sahəsi olan evin dam örtüyü və iki otağı, habelə həyətdə yerləşən talvar və “BMW” markalı minik avtomobili yanıb. Yaxınlıqdakı digər fərdi yaşayış evində də dam örtüyü və otaqlar zərər görüb.

Hadisə yerinə baxış zamanı həyətyanı sahədə Rafət Həsənovun, evdə isə 1968-ci il təvəllüdlü Ceyran Həsənovanın meyitləri aşkarlanıb.

İlkin araşdırmaya əsasən, Rafət Həsənovun şəxsi münasibətlər zəminində keçmiş həyat yoldaşını qəsdən öldürdükdən sonra evi və avtomobili yandırdığı, daha sonra isə intihar etdiyi ehtimal olunur.

Faktla bağlı Binəqədi rayon prokurorluğunda Cinayət Məcəlləsinin 120.1 (qəsdən adam öldürmə) və 125-ci maddələri ilə cinayət işi başlanıb, istintaq davam edir.