İşdən çıxarılmağımı sizdən eşidirəm - Yeni Klinikanın rəhbəri

“Yeni Klinika”nın direktoru Barat Yusubov vəzifəsindən azad edildiyi barədə yayılan məlumatların ona rəsmi qaydada bildirilmədiyini deyib.

Yusubov Bakıvaxtı.az-a bildirib ki, məsələ ilə bağlı TƏBİB-dən ona hər hansı bildiriş və ya göstəriş daxil olmayıb.

“İşdən çıxarılmağımla bağlı məlumatı sosial mediadan eşitdim, amma buna dair rəsmi bir bildiriş olmayıb. Hər halda belə məsələ olsa idi, mənə də bildirilərdi. Bu gün saat 18:00-dək işdə olmuşam, sabah da saat 09:00-da işdə olacağam”, - o deyib.

Bakupost.az daha əvvəl TƏBİB-in icraçı direktoru Anar Bayramovun bununla bağlı müvafiq əmr imzaladığını yazıb. Nəşrin məlumatına görə, Yusubovun ərizəsi bir müddət əvvəl alınıb və bu gün rəsmiləşdirilib.

TƏBİB-dən məsələ ilə bağlı hələlik rəsmi açıqlama verilməyib.