Bahar Muradova: Azərbaycan azad ərazilərdə yeni şəhərsalma modeli yaradır

Azərbaycan işğaldan azad olunmuş ərazilərdə həyata keçirilən bərpa və yenidənqurma layihələri ilə post-münaqişə dövründə şəhərsalma sahəsində yeni model formalaşdırır və bu təcrübə beynəlxalq səviyyədə də diqqət çəkir. Bunu Ailə, Qadın və Uşaq Problemləri üzrə Dövlət Komitəsinin sədri Bahar Muradova bildirib.

 
Ailə, Qadın və Uşaq Problemləri üzrə Dövlət Komitəsinin sədri Bahar Muradova deyib ki, Azərbaycan bu sahədə bir çox ölkələrdən fərqli olaraq böyük təşəbbüslərlə çıxış edir və ölkənin rolu getdikcə daha görünən olur.

Onun sözlərinə görə, Azərbaycanın ev sahibliyi edəcəyi Ümumdünya Şəhərsalma Forumu 13 bu baxımdan strateji əhəmiyyət daşıyır.

Muradova bildirib ki, son illərin ictimai-siyasi və post-münaqişə reallıqları fonunda şəhərsalma artıq yalnız infrastrukturun bərpası və dağıdılmış ərazilərin yenidən qurulması məsələsi deyil.

“Bu, ilk növbədə, milli inkişaf, əhalinin maraqlarının nəzərə alınması, sosial ədalətin və təhlükəsizliyin təmin olunması məsələsidir”, - o deyib.

Komitə sədrinin sözlərinə görə, işğaldan azad olunmuş ərazilərdə aparılan yenidənqurma işləri “ağıllı şəhər” və “ağıllı kənd” konsepsiyalarının tətbiqi, həmçinin müasir urban idarəetmə modellərinin formalaşdırılması ilə müşayiət olunur.
O qeyd edib ki, bu yanaşma Azərbaycanın şəhərsalma sahəsində yeni inkişaf mərhələsinə qədəm qoyduğunu və yeni nümunə yaratdığını göstərir.

Muradova deyib ki, qlobal miqyasda şəhərsalma getdikcə daha çox insan mərkəzli yanaşmaya əsaslanır və bu model yalnız fiziki infrastrukturun qurulmasını deyil, insanların rifahını, təhlükəsizliyini və sosial ədaləti də əhatə edir.

Onun fikrincə, Azərbaycanın əldə etdiyi nəticələr yalnız münaqişənin həlli və davamlı nizamlanma baxımından deyil, həm də həmin münaqişənin nəticələrinin aradan qaldırılması və yeni standartlara uyğun yaşayış mühitinin yaradılması baxımından nümunə sayıla bilər.

Muradova əlavə edib ki, BMT-Habitat kimi beynəlxalq qurumlar inklüziv, təhlükəsiz və dayanıqlı şəhərlərin qurulmasını prioritet istiqamət kimi müəyyən edir və Azərbaycanın bu proseslərdə fəal iştirakı ölkənin beynəlxalq platformalarda artan rolunu göstərir.

Gülnar Nazimqızı