Azərbaycan Ukraynaya humanitar yardım olaraq 5 sərnişin avtobusu verib

Azərbaycan Ukraynaya humanitar yardım olaraq beş ədəd sərnişin avtobusu verib.Bu barədə Ukraynanın xarici işlər naziri Andrey Sibiqa “X” hesabında məlumat verib.

“Bu səfər çərçivəsində Azərbaycan icmalarımızın ehtiyacları üçün Ukraynaya humanitar yardım olaraq beş sərnişin avtobusu təqdim edib. 2022-ci ildən etibarən Azərbaycan Ukrayna xalqına dəstək vermək üçün dəfələrlə öz töhfəsini verib. Xüsusilə, enerji sistemimizin davamlı hücumlar altında işləməsini təmin etməyə kömək edən yüksək güclü generatorlar, transformatorlar və digər vacib avadanlıqlar daxil olmaqla 45 milyon dollardan çox humanitar yardım göstərib. Eyni dərəcədə vacib olan uşaqlarımıza göstərilən dəstəkdir. 500-dən çox ukraynalı uşaq Azərbaycanda bərpa proqramlarında iştirak edib – bu isə müharibə dövründə xüsusilə dəyərlidir. Biz bu həmrəyliyi yüksək qiymətləndiririk, çünki bu, Ukraynanın möhkəm dayanmasına və irəliləməsinə kömək edir”, - Sibiqa qeyd edib.