Deputat Gömrük Məcəlləsi ilə bağlı bir sıra təkliflər verib

Deputat Vüqar Bayramov “Gömrük Məcəlləsinə dəyişiklik edilməsi haqqında” qanun layihəsində nəzərdə tutulan bir sıra müddəaların yenidən baxılmasını təklif edib.

Bayramov bildirib ki, səyyar gömrük auditi üçün 20 iş günü və əlavə hallarda 30 iş gününə qədər uzadılma müddəti uzun hesab oluna bilər. Onun sözlərinə görə, proseslərin rəqəmsallaşması fonunda bu müddətin azaldılması məqsədəuyğundur.

Deputat həmçinin risklərin idarəedilməsi sisteminin “elektron risk idarəetmə sistemi” kimi dəqiq adlandırılmasını təklif edib.

Layihədə xarici ticarət iştirakçısının borcu səbəbindən ölkədən çıxışına məhdudiyyət qoyulması mexanizmi də yer alır. Bayramov bu halda minimum borc həddinin müəyyənləşdirilməsinin vacibliyini vurğulayıb və kiçik məbləğlər üzrə məhdudiyyətlərin tətbiqinin məqsədəuyğun olmadığını bildirib.

Eyni zamanda, malların müvəqqəti saxlancda qalma müddətinin 4 ay müəyyən olunması da müzakirə edilib. Deputat bu müddətin beynəlxalq təcrübə ilə müqayisədə yenidən qiymətləndirilməsini təklif edib.

Gülnar Nazimqızı