Aqualink sərgilərdə su mühəndisliyi həllərini nümayiş etdirir

 Azərbaycanın su mühəndisliyi şirkətlərindən Aqualink LLC Bakıda keçirilən beynəlxalq aqrar və qida sərgilərində aqro-qida zənciri üzrə kompleks həllərini təqdim edir.

Şirkət 5–8 may tarixlərində Caspian Agro Week 2026 və Interfood Azerbaijan çərçivəsində Bakı Sərgi Mərkəzi ərazisində təşkil olunan sərgilərdə iştirak edir.

Aqualink-in təqdim etdiyi həllər kənd təsərrüfatı, qida sənayesi və HORECA sektorlarını əhatə edir. Şirkət bu sahələri vahid sistem kimi qiymətləndirərək məhsuldarlıq, istehsal keyfiyyəti və xidmət səviyyəsinin əsasını su resurslarının effektiv idarə olunmasında görür.

Kənd təsərrüfatı üçün suvarma və drenaj sularının emalı, fertiqasiya, istixana və hidroponik təsərrüfatlar üçün əks-osmoz və UV dezinfeksiya sistemləri təqdim olunur. Qida sənayesi istiqamətində isə istehsalat suyu hazırlığı, CIP sistemləri, demineralizasiya və çirkab suların emalı texnologiyaları təklif edilir.

HORECA sektoru üçün şirkət içməli su təchizatı, hovuz və SPA sularının idarə olunması, həmçinin mətbəx və çamaşırxana üçün filtrasiya və yumşaltma sistemləri təqdim edir.

Şirkət bildirir ki, bu yanaşma su sərfiyyatının azaldılması, əməliyyat xərclərinin optimallaşdırılması və beynəlxalq standartlara uyğunluğun təmin edilməsinə xidmət edir.

Aqualink-in məlumatına görə, şirkət ISO 9001:2015 və ISO 14001:2015 sertifikatlarına malikdir və 200-dən çox layihə həyata keçirib. O, həmçinin Link Chemie AG daxil olmaqla bir sıra Avropa şirkətlərinin Azərbaycandakı tərəfdaşıdır.

Şirkət nümayəndəsi bildirib ki, müasir aqro-qida və qonaqpərvərlik sektorları artıq ayrı-ayrı avadanlıqlardan çox, inteqrə olunmuş mühəndislik həllərinə ehtiyac duyur.

Sərgi iştirakçıları 8 may tarixinədək Aqualink-in pavilyonunda mütəxəssislərlə görüşərək texniki məsləhətlər ala bilərlər.