Azərbaycanda kart fırıldaqçılığı halları kəskin artıb

Bu ilin birinci rübündə Azərbaycanda ödəniş kartları ilə bağlı ölkədaxili fırıldaqçılıq hallarının sayı və dəyəri kəskin artıb, bu barədə Azərbaycan Mərkəzi Bankının məlumatında bildirilir.

Məlumata görə, yanvar-mart aylarında ölkədaxili 4 995 fırıldaqçılıq halı qeydə alınıb ki, onların ümumi dəyəri 1 milyon 350,5 min manat təşkil edib. Bu göstəricilər ötən ilin eyni dövrü ilə müqayisədə müvafiq olaraq 5 dəfə və 3,1 dəfə artıb.

Hesabat dövründə ölkəxaricində baş vermiş kart fırıldaqçılığı hallarının sayı isə 64,1% artaraq 6 020-yə, ümumi dəyəri isə 73,1% yüksələrək 325,3 min manata çatıb.

AMB-nin məlumatına əsasən, ölkədaxili fırıldaqçılıq hallarının 21,4%-i hesabların ələ keçirilməsi, 78,6%-i isə digər üsullarla törədilib. Xaricdə baş verən fırıldaqçılıq hallarının 60,2%-i kartın fiziki iştirakı olmadan həyata keçirilib.

Statistikaya görə, ölkədaxili fırıldaqçılıq hallarının 98,3%-i elektron ticarət və mobil tətbiqlər üzərindən qeydə alınıb. Xaricdə baş verən oxşar halların isə 80,6%-i elektron ticarət və mobil tətbiqlərlə bağlı olub.