Bakıda IX sinif şagirdi digər şagirdi məktəbin sanitar qovşağında döyüb

Mayın 12-də Bakıdakı 271 nömrəli tam orta məktəbdə iki IX sinif şagirdi arasında tənəffüs zamanı münaqişə baş verib. Bu barədə anews.az-ın sorğusuna cavab olaraq məktəbdən bildirilib.

Hadisə sanitar qovşaqda qeydə alınıb və tərəflərdən heç biri məsələ ilə bağlı müəllim və ya məktəb rəhbərliyinə dərhal məlumat verməyib. Belə ki, məktəbin sanitar qovşağında şagirdin digər şagirdi döyməsi videoları paylaşılıb. 

Videogörüntülərin sosial şəbəkələrdə yayılmasından sonra məsələ məktəb rəhbərliyi tərəfindən araşdırılıb. Bildirilib ki, fiziki təzyiqə məruz qalan şagird xəsarət almayıb.

Məktəb rəhbərliyi aidiyyəti qurumlara məlumat verib, valideynlər məktəbə dəvət olunub və onlara uşaqların davranışlarına nəzarətin gücləndirilməsi ilə bağlı tövsiyələr verilib.

Təhsil müəssisəsində psixoloq tərəfindən şagirdlərə dəstək tədbirlərinə başlanılıb.

Elm və Təhsil Nazirliyinin Uşaq Müdafiəsi İdarəsinin nümayəndələri məktəbə baxış keçirib, şagird davranış qaydalarına əməl olunmasına nəzarətin artırıldığı bildirilib.

Məsələ hüquq-mühafizə orqanları və aidiyyəti qurumlar tərəfindən araşdırılır.

Gülnar Nazimqızı