Anar Quliyev: Urbanizasiya problemləri müzakirədən çox real fəaliyyət tələb edir

Urbanizasiya və mənzil təminatı ilə bağlı problemlərin həlli üçün real addımların atılması vacibdir. Bunu Dövlət Şəhərsalma və Arxitektura Komitəsinin sədri Anar Quliyev Bakıda keçirilən Ümumdünya Şəhərsalma Forumunun 13-cü Sessiyası (WUF13) çərçivəsində assambleyaların birgə açılış sessiyasında bildirib.

Onun sözlərinə görə, urbanizasiya və xüsusilə mənzil təminatı ilə bağlı çağırışlar artıq yalnız müzakirə deyil, konkret fəaliyyət tələb edir.

“Assambleyaların birgə açılışı sadəcə rəsmi mərasim deyil. Bu, bütün tərəfləri prosesin əvvəlindən bir araya gətirərək ortaq baxış formalaşdırır və WUF13 üçün istiqaməti müəyyən edir", -Quliyev deyib.

Komitə sədri bildirib ki, Azərbaycan nümayəndələrinin müxtəlif maraqlı tərəflər qruplarında fəal iştirakı ölkənin inklüziv şəhər inkişafına sadiqliyini göstərir.

Quliyevin sözlərinə görə, assambleyaların nəticələri WUF13 çərçivəsində aparılacaq daha geniş müzakirələrə, “Bakı Fəaliyyət Çağırışı”na, Yeni Şəhər Gündəliyinin icrasına, eləcə də DİM 11 və iqlim fəaliyyəti üzrə qlobal proseslərə töhfə verəcək.

Gülnar Nazimqızı