Muxtar Babayev: Azərbaycanda həddindən artıq isti günlərin sayı altı dəfə artıb

Azərbaycanda son 25 il ərzində orta illik temperatur təxminən 1,5 dərəcə Selsiyə çatıb və son dörd ildə ardıcıl olaraq 1,5 dərəcəni ötüb.  Bunu Prezidentin İqlim Məsələləri üzrə Nümayəndəsi Muxtar Babayev WUF13 çərçivəsində keçirilən "Erkən xəbərdarlıq sistemləri və iqlim dayanıqlı şəhərlər" adlı tədbirdə deyib.

“Həddindən artıq isti günlərin sayı altı dəfə artıb. Quraqlıq dövrünün müddəti isə 20 faizdən çox yüksəlib. Bu tendensiya açıq şəkildə göstərir ki, iqlimə davamlılıq şəhər planlaşdırılması və inkişafının əsas elementlərindən birinə çevrilməlidir. Bu gün qarşılaşdığımız problemlər bir-biri ilə əlaqəlidir və cavablarımız da eyni şəkildə əlaqəli olmalıdır. Heç bir ölkə dayanıqlılığı təkbaşına qura bilməz. Heç bir şəhər təkbaşına uyğunlaşa bilməz. Tərəfdaşlıq, elm, texnologiya və beynəlxalq əməkdaşlıq iqlimə davamlı şəhər gələcəyinin formalaşdırılmasında əsas rol oynayacaq. Azərbaycan bu səylərə töhfə verməyə, həmçinin dialoq və əməkdaşlığı gücləndirməyə sadiq qalır. Ümid edirik ki, bu sessiya daha güclü dialoqa və praktik əməkdaşlığa töhfə verəcək”,- o vurğulayıb
 

Aytac Zeynalova