Xəzər dənizinin səviyyəsi ardıcıl olaraq enir

“Xəzər dənizinin orta illik səviyyəsi son üç ildə ardıcıl olaraq enir”.

Bu barədə Azərbaycan Milli Elmlər Akademiyasının (AMEA) Coğrafiya İnstitutunun aparıcı elmi işçisi Nazim Əhmədov məlumat verib. Onun sözlərinə görə, Xəzər dənizinin səviyyəsi 2010-2011-ci illərdə 9 santimetr, 2011-2012-ci illərdə isə 12 sm enib. N. Əhmədov bildirib ki, hazırda Xəzərin səviyyəsi okean səviyyəsindən 27.5 metr aşağıdır: “2010-cu ilədək Xəzərin səviyyəsinin enməsi ilə suyun səviyyəsinin qalması prosesi də gedirdi. 2010-cu ildən isə ardıcıl enmə müşahidə olunur”.

Mütəxəssis, Xəzərdə suyun azalmasına müxtəlif amillərin təsir etdiyini deyib: “Burda iqlim faktoru əsas rol oynayır, dəyişkənlik, tektonik amillər, çaylarda suyun səviyyəsinin azalması da təsir edir. Amma 85-90 faiz səviyyənin dəyişməsini formalaşdıran əsas səbəb iqlimdir. Hazırda qlobal istiləşmə gedir. Xəzərə əsas su gətirən Volqa çayının hövzəsində nəmlik, rütubətlik çoxalıb. Son dövrdə, xüsusən son 3 ildə bu faktor azalıb, buxarlanma gedir və səviyyə düşməyə meyllidir”.

N. Əhmədovun sözlərinə görə, proqnozlar Xəzərdə hazırda enmə dövrünün yaşandığını göstərir.

Qeyd edək ki, 1995-ci ildə Xəzər dənizində suyun səviyyəsi ən yüksək həddə çatıb. Ən aşağı səviyyə isə 1977-ci ildə qeydə alınıb.

APA