Rossbax: Gələcəyin şəhərləri yaşlanan əhalinin ehtiyaclarına uyğun planlaşdırılmalıdır

Yaşlanan əhali gələcəyin şəhər planlaşdırılmasında əsas prioritetlərdən birinə çevrilməlidir. Bu fikri Bakıda keçirilən Ümumdünya Şəhərsalma Forumu 13-cü sessiyası (WUF13) çərçivəsində təşkil olunmuş “Həyat boyu mənzil təminatı – bütün yaşlı insanlar üçün adekvat mənzil” mövzusunda dəyirmi masada Anaklaudia Rossbax səsləndirib.

UN-Habitat rəhbərinin sözlərinə görə, dünyanın bir çox ölkəsində demoqrafik dəyişikliklər şəhərlərin gələcək inkişafına yeni yanaşmalar tələb edir. O bildirib ki, bəzi ölkələrdə gənclərin böyük şəhərlərə üz tutması kiçik yaşayış məntəqələrinin boşalmasına səbəb olur.

“Yaponiyada və Avropanın bəzi ölkələrində, o cümlədən İspaniya və İtaliyada kiçik şəhərlər tədricən boşalır. Gənclər həmin ərazilərdə qalmaq istəmir. Nəticədə yaşlı insanlar təcrid vəziyyətində qalır, istifadəsiz evlər və boş yaşayış sahələri yaranır. Bir tərəfdən mənzil qıtlığı müşahidə olunur, digər tərəfdən isə boş evlərin sayı artır”, – deyə o qeyd edib.

Rossbax vurğulayıb ki, şəhər mühitinin planlaşdırılması zamanı insanların gündəlik həyat ehtiyacları diqqət mərkəzində saxlanılmalıdır. Onun fikrincə, şəhərlərdə ictimai məkanların əlçatanlığı, sosial əlaqələrin qurulması və xidmətlərə rahat çıxış yaşlı insanların həyat keyfiyyətinə birbaşa təsir göstərir.

O əlavə edib ki, bir sıra ölkələr artıq bu dəyişikliklərə uyğunlaşmağa çalışsa da, bu istiqamətdə hələ də ciddi çətinliklər qalmaqdadır.

Aytac Zeynalova