Kanadada mənzil böhranının həlli üçün ildə 430–480 min yeni ev tikintisi tələb olunur

Kanadada mənzil böhranının aradan qaldırılması üçün hər il yüz minlərlə yeni yaşayış sahəsinin inşasına ehtiyac var. Bu barədə Kanada İpoteka və Mənzil Korporasiyası (CMHC) Lindi Nili Bakıda keçirilən Ümumdünya Şəhərsalma Forumu 13-cü sessiyası (WUF13) çərçivəsində “Əlçatan mənzil maliyyələşdirilməsi” mövzusunda təşkil olunan dəyirmi masada çıxış edərkən bildirib.

Onun sözlərinə görə, Kanadada mövcud mənzil çatışmazlığının aradan qaldırılması və əlçatanlığın bərpası üçün 2035-ci ilə qədər hər il 430 000–480 000 yeni mənzil tikilməlidir.

Vitse-prezident qeyd edib ki, ölkədə mövcud mənzil defisiti təxminən 1 trilyon ABŞ dolları həcmində qiymətləndirilir və bu boşluğun yalnız dövlət resursları ilə örtülməsi mümkün deyil.

“Bu səbəbdən mənzil sisteminin elə qurulması vacibdir ki, özəl sektor kapitalı müxtəlif əlçatanlıq səviyyələrində geniş miqyasda tikinti prosesinə cəlb oluna bilsin”, – deyə o bildirib.

Kanada İpoteka və Mənzil Korporasiyası (CMHC) nümayəndəsi əlavə edib ki, investisiyaların cəlbi üçün bazarda sabitlik və proqnozlaşdırıla bilən layihə icra mühiti vacibdir. Onun sözlərinə görə, icazə proseslərində gecikmələr, uzun tikinti müddətləri və yüksək rüsumlar layihələrin iqtisadi səmərəliliyinə ciddi təsir göstərir.

O qeyd edib ki, Kanadada ipoteka sığortası, qiymətli kağızlaşdırma proqramları və kirayə mənzil tikintisi üçün nəzərdə tutulan 55 milyard dollarlıq “Apartment Construction Loan Program” kimi geniş maliyyə alətləri tətbiq olunur.

Aytac