BDYPİ əlverişsiz hava şəraiti ilə bağlı sürücülərə və piyadalara çağırış edib

Baş Dövlət Yol Polisi İdarəsi əlverişsiz hava şəraiti ilə əlaqədar sürücü və piyadalara müraciət edib.

İdarədən verilən məlumata görə, Milli Hidrometeorologiya Xidmətinin proqnozuna əsasən, mayın 25-26-da Bakı və Abşeron yarımadasında, eləcə də ölkənin bəzi bölgələrində fasilələrlə intensiv yağış, güclü külək və şimşək müşahidə olunacaq. Ayrı-ayrı ərazilərdə yağıntının qısamüddətli intensivləşəcəyi, dolu düşəcəyi və dağlıq ərazilərdə qar yağacağı ehtimal edilir.

Qurum bildirib ki, əlverişsiz hava şəraiti yol hərəkətinin təhlükəsizliyinə mənfi təsir göstərərək qəza riskini artırır. Bu səbəbdən sürücülərə hərəkət sürətini hava və yol şəraitinə uyğun seçmək, ara məsafəsini artırmaq, kəskin manevr və əsassız ötmələrdən çəkinmək tövsiyə olunub.

Müraciətdə qeyd edilib ki, görünmə məsafəsinin məhdudlaşdığı hallarda işıq cihazlarından düzgün istifadə edilməli, uzaq işıqlar qarşıdan gələn nəqliyyat vasitələrinə mane olmayacaq şəkildə tənzimlənməlidir.

Piyadalara isə yolu yalnız müəyyən edilmiş keçidlərdən keçmək və məhdud görünmə şəraitində daha ehtiyatlı davranmaq çağırışı edilib.

Baş Dövlət Yol Polisi İdarəsi xüsusilə küləkli hava şəraitində moped, motosiklet və skuter sürücülərinin daha diqqətli olmasının vacibliyini vurğulayıb. Bildirilib ki, güclü külək bu nəqliyyat vasitələrinin idarə olunmasını çətinləşdirərək aşma riskini artırır.