Elə etməliyik insanların kəndlərə qayıdışı başlasın - Prezident

Genişmiqyaslı urbanizasiya və kəndlərdən şəhərlərə axın həm Azərbaycan, həm də digər ölkələr üçün əsas çağırışlardan biridir. Bunu prezient İlham Əliyev bu gün keçirdiyi müşavirədə deyib.

Prezident qeyd edib ki, bu məsələ yaxın vaxtlarda Bakıda keçirilən Ümumdünya Şəhərsalma Forumu zamanı da geniş müzakirə olunub.

“Biz elə etməliyik ki, kəndlərdən şəhərlərə yox, şəhərlərdən kəndlərə qayıdış prosesi başlasın”, - Əliyev deyib.

Onun sözlərinə görə, bunun üçün kənd və şəhər arasında sosial, iqtisadi və infrastruktur fərqləri minimuma endirilməlidir.

Prezident bildirib ki, həyata keçirilən Regional İnkişaf proqramlarının əsas məqsədi bölgələrdə yaşayış və məşğulluq imkanlarını artırmaq olub.

Əliyev qeyd edib ki, regionlarda müasir xəstəxanalar tikilib, məktəb infrastrukturu yenilənib və yararsız vəziyyətdə olan məktəblərin sayı ildən-ilə azalır.

“Bizim məktəblərin təqribən 80-90 faizi təmir edilib və ya yenidən tikilib”, - prezident vurğulayıb.

Onun sözlərinə görə, bölgələrdə məşğulluğun artırılması və insanların torpağa bağlılığının gücləndirilməsi üçün kənd təsərrüfatının inkişafına yeni təkan verilməlidir.

Gülnar Nazimqızı