Qadınların maaşı kişilərin əməkhaqqının 69%-i səviyyəsindədir

Azərbaycanda qadınların orta aylıq əməkhaqqısı kişilərin orta maaşının 69,1%-nə bərabərdir. Bunu deputat Vüqar Bayramov deyib. 

Deputatın sözlərinə görə, bu göstərici qlobal miqyasda 77-80% civarındadır.

Bayramov qeyd edib ki, hazırda ölkədə məşğul əhalinin 2 milyon 414 min nəfərini qadınlar, 2 milyon 615 min nəfərini isə kişilər təşkil edir. İşçi qüvvəsində qadınların sayı 2 milyon 571 min nəfərə çatır.

Onun sözlərinə görə, qadınların ən çox çalışdığı sahə təhsil sektorudur. Əmək müqaviləsi ilə çalışan 722 min 147 qadından 242 min 801 nəfəri bu sahədə fəaliyyət göstərir ki, bu da muzdlu qadın işçilərin 33,6%-ni təşkil edir.

Deputat bildirib ki, qadınların üstünlük verdiyi ikinci sektor səhiyyə və sosial xidmətlər sahəsidir. Bu istiqamətdə 116 min 976 qadın çalışır.

Bayramov əlavə edib ki, qadınların orta aylıq əməkhaqqısının ən yüksək olduğu sahə mədənçıxarma sənayesidir. Bu sektorda qadınların orta maaşı 2915 manat təşkil edir. Maliyyə və sığorta sektorunda bu göstərici 1813 manat, informasiya və rabitə sahəsində isə 1353 manatdır.

Onun sözlərinə görə, təhsil sektorunda çalışan qadınların orta aylıq maaşı 731 manat səviyyəsindədir.

Deputat qadın sahibkarların Azərbaycan Respublikası Sahibkarlığın İnkişafı Fondunun güzəştli kreditlərinə çıxış imkanlarının artırılması üçün kvotaların tətbiqini təklif edib.

Bayramov həmçinin qadınların pensiya kapitalına xüsusi əmsalların tətbiq olunmasını və tək qadınlara daha tez pensiyaya çıxmaq hüququnun verilməsini məqsədəuyğun hesab etdiyini bildirib.

Deputat qeyd edib ki, süni intellekt və rəqəmsal texnologiyaların sürətli inkişafı fonunda qadınların iqtisadi imkanlarının genişləndirilməsi gender siyasətinin əsas istiqamətlərindən biri olaraq qalır.

Gülnar Nazimqızı