Azərbaycanda Qurban bayramı qeyd edilir

Azərbaycanda bu gün Qurban bayramı qeyd olunur.

Müsəlman aləmində ən müqəddəs bayramlardan biri hesab olunan Qurban bayramı hicri təqvimi ilə zilhiccə ayının 10-cu günündən başlayır. Bu il bayram miladi təqvimlə mayın 27-nə təsadüf edir.

Bayram münasibətilə ölkənin bütün məscidlərində namaz qılınacaq. Bakıda bayram namazı Əjdərbəy məscidində saat 08:00-da, Təzəpir məscidində isə 09:00-da keçiriləcək.

Qurban kəsimi bu gün və sabah həyata keçirilə bilər. Azərbaycan Qida Təhlükəsizliyi Agentliyinin ayırdığı xüsusi məkanlarda keçiriləcək kəsim prosesinə Qafqaz Müsəlmanları İdarəsinin din xadimləri nəzarət edəcək.

Azərbaycan müstəqilliyini bərpa etdikdən sonra Milli Məclisin 1992-ci il 27 oktyabr tarixli “Azərbaycan Respublikasının bayramları haqqında” qanununa əsasən, Qurban bayramı dövlət səviyyəsində qeyd olunur.

Nazirlər Kabinetinin qərarına əsasən, mayın 27 və 28-i Qurban bayramı günləri elan edilib.