Aali məktəblərdə məqsədli kapital fondları yaradıla bilər

Azərbaycanda ali məktəblərdə məqsədli kapital fondlarının yaradılması nəzərdə tutulur. Təhsil nazirinin müşaviri Elxan Hüseynov Trend-ə bildirib ki, bu gün ali məktəblər yalnız dövlət büdcəsindən maliyyələşməklə inkişaf edə bilməzlər. Məqsədli kapital fondlarının yaradılması ali məktəblərin maliyyələşməsində çox mühüm rol oynaya bilər.Müşavirin sözlərinə görə, xarici ölkələrdə elmin və təhsilin inkişafına yönələn məqsədli kapital fondlarının yaradılması təcrübəsi çox geniş istifadə edilir. Postsovet ölkələrinin bəzilərində bu fondların yaradılmasına artıq maraq artıb. Azərbaycanda da belə fondlar yaradılarkən dünya təcrübəsindən istifadə etmək çox vacibdir: "Harvard, Stenford, Oksford, Kembric, Münhen universitetləri bu sahədə böyük təcrübəyə malikdirlər. Harvard Universitetinin 4 milyard dollara yaxın gəlirinin 37, Stenford Universitetinin isə bütün gəlirlərinin 22 faizi məqsədli kapital fondlarının payına düşür".E.Hüseynovun dediyinə görə, məqsədli kapital fondları əsasən ayrı-ayrı insanlar, biznes sektoru tərəfindən verilmiş ianələr hesabına yaranır. Dünya ölkələrinin təcrübələrinə əsasən, fondlarda toplanılan maliyyə vəsaitləri birdəfəlik xərclənə bilməz. Bu vəsaitlər yalnız banka köçürülür. Məktəblər isə banklarda uzunmüddətli yatırılmış həmin vəsaitlərin üzərinə gələn illik faizlərdən istifadə edirlər. Məktəb həmin gəlirləri yalnız elmin, təhsilin inkişafı üçün deyil, idmanın, səhiyyə xidmətlərinin, arxiv işinin inkişafı üçün də istifadə edə bilər. Həmin vəsaitlərin banklarda qalması məktəblərin gəlirlərinin daha da çoxalmasına imkan yaradar.Ali məktəblər belə fondların sayını və orada toplanan vəsaitlərin məbləğini artırmaqla, öz gəlirlərini də artıra bilərlər: "Bu gün elmin, təhsilin inkişafına yardım göstərə bilən məzunlarımız var. Hesab edirəm ki, bizim ali məktəblər məzunların karyera inkişafını izləsələr, onlarla yaxşı əlaqələr qursalar, həmin insanlar tərəfindən müstəqil fondlara maliyyə vəsaitinin keçirilməsinə nail olarlar".TN rəsmisinin sözlərinə görə, bu fondların yaradılması və istifadəsi ilə bağlı mövcud normativ-hüquqi bazada müvafiq əlavə və dəyişikliklər edilməlidir. Belə fondların yaradılması ali məktəblərin inkişafına xidmət etməklə, onların rəqabət qabiliyyətinin artmasına, dünya ali məktəblərinin reytinq cədvəllərində layiqli yer tutmasına əlavə imkanlar yaradar.ANN.Az