420-550 manat maaşla peşəkar kadr tapmaq çətindir - deputat kitabxanaçıların maaşına toxunub

Təcrübəli kitabxanaçıların qorunması və onların əmək şəraitinin yaxşılaşdırılması vacibdir. Bunu deputat Fazil Mustafa Milli Məclisdə “Kitabxana sisteminin mövcud vəziyyəti və inkişaf perspektivləri” mövzusunda keçirilən ictimai dinləmədə deyib. 

Deputat bildirib ki, kitabxana sahəsinə yalnız ixtisas diplomu prizmasından yanaşmaq düzgün deyil. Onun sözlərinə görə, kitabı sevən, zəngin mütaliə təcrübəsinə və geniş dünyagörüşünə malik insanların bu sahədə fəaliyyət göstərməsi daha önəmlidir.

Fazil Mustafa qeyd edib ki, müxtəlif attestasiya və sertifikasiya prosesləri zamanı uzun illər formalaşmış peşəkar kitabxanaçı potensialının itirilməsi ciddi narahatlıq doğurur.

"Elə sahələr var ki, orada təcrübə xüsusi əhəmiyyət daşıyır. Necə ki, 70 yaşlı təcrübəli müəllimin itirilməsi məktəbin keyfiyyətinə təsir göstərir, eyni yanaşma kitabxana sisteminə də tətbiq olunmalıdır. Bu sahədə formalaşmış yaddaşı və təcrübəni qorumalıyıq", -  deputat vurğulayıb.

Deputat hesab edir ki, hər hansı sertifikasiya və ya qiymətləndirmə tədbirlərindən əvvəl kitabxanaların maddi-texniki bazası və iş şəraiti qiymətləndirilməlidir. O bildirib ki, ölkənin müxtəlif bölgələrində fəaliyyət göstərən kitabxanaların əksəriyyətində infrastruktur problemləri mövcuddur, binaların bir hissəsi müasir tələblərə cavab vermir.

Fazil Mustafa kitabxana işçilərinin əməkhaqlarına da toxunaraq qeyd edib ki, 420-550 manat arasında dəyişən maaşlarla bu sahəyə yeni və peşəkar kadrların cəlb edilməsi çətin görünür.
Onun sözlərinə görə, uzun illər bu sahədə çalışan əməkdaşlar ağır şəraitdə fəaliyyət göstərirlər və onların sosial müdafiəsinin gücləndirilməsi vacibdir.

Deputat beynəlxalq təcrübədən danışaraq bildirib ki, bir çox ölkələrdə kitabxanalar müasir mədəniyyət mərkəzlərinə çevrilib. Xüsusilə Latviya və Türkiyədə inşa olunan yeni kitabxana komplekslərinin cəmiyyət üçün cəlbedici məkanlara çevrildiyini qeyd edən Fazil Mustafa, Azərbaycanda da kitabxanaların nüfuzunun artırılmasının vacibliyini vurğulayıb.

Gülnar Nazimqızı