2026-cı ildə 1,56 milyon hektar torpaq sahəsinin suvarılması planlaşdırılır

Son illərdə ölkədə yeni su ehtiyatlarının yaradılması, mövcud infrastrukturun yenilənməsi, su itkilərinin azaldılması və sudan qənaətli istifadənin təmin edilməsi istiqamətində ardıcıl işlər görülür. Bunu Dövlət Su Ehtiyatları Agentliyinin sədr müavini İlham Bayramov Milli Məclisdə çıxışı zamanı bildirib.

O qeyd edib ki, Prezident İlham Əliyevin təşəbbüsü və rəhbərliyi ilə son 20 ildə ümumi tutumu 577 milyon kubmetr olan beş yeni su anbarı tikilib, 37 milyon kubmetr tutuma malik beş su anbarı isə əsaslı təmir olunub. Bununla yanaşı, suvarma kanalları, kollektor-drenaj şəbəkələri və boru xətləri yenilənib, minlərlə yeni suvarma quyusu qazılıb.

Sədr müavini bildirib ki,son dövrdə Zabux su anbarı istifadəyə verilib, bir sıra su anbarları və su qovşaqları əsaslı təmir olunub. Yeni magistral suvarma xətti vasitəsilə Qubadlı və Zəngilan rayonlarında ümumilikdə 12 min hektar əkin sahəsinin su təminatı yaxşılaşdırılıb.

Bayramovun sözlərinə görə, hazırda icra olunan ən mühüm layihələrdən biri Şirvan suvarma kanalının tikintisidir. Uzunluğu 304,15 kilometr olacaq kanal təxminən 228 min hektar torpaq sahəsinin suvarılmasına xidmət edəcək.

Layihə nəticəsində 112 min hektar mövcud sahənin su təminatı yaxşılaşacaq, 106 min hektar yeni torpaq sahəsi isə əkin dövriyyəsinə cəlb olunacaq.

O bildirib ki, 2026-cı ildə 1 milyon 565 min 360 hektar torpaq sahəsinin suvarılması proqnozlaşdırılır.

Bunun üçün 6,8 milyard kubmetr su təminatının ayrılması planlaşdırılır. Bu həcmin 52 faizi dənli və yem bitkilərinin, 48 faizi isə pambıqçılıq, bostançılıq və digər kənd təsərrüfatı sahələrinin su tələbatına yönəldiləcək.

Gülnar Nazimqızı