Moskva–Naxçıvan reysində sərnişin təyyarənin qapısını açmağa cəhd edib

Rusiyanın Utair aviaşirkətinə məxsus Moskva–Naxçıvan reysində sərnişinlərdən biri uçuş zamanı təyyarənin qapısını açmağa cəhd edib.Bu barədə xarici media məlumat yayıb. 

Məlumata görə, hadisə təyyarə Xəzər dənizi üzərində olarkən baş verib. Tualet axtaran qadın sərnişin səhvən təyyarənin qapısını açmağa çalışıb və bu, həyəcan siqnalının işə düşməsinə səbəb olub.

Ekipajın operativ müdaxiləsi nəticəsində siqnal söndürülüb, salonda təzyiq itkisi və ya digər fövqəladə vəziyyət qeydə alınmayıb.

Təyyarə isə Naxçıvandakı əlverişsiz hava şəraiti səbəbindən planlaşdırılan marşrutu tamamlaya bilməyib. Hava limanının reysi qəbul edə bilməməsi nəticəsində təyyarə ehtiyat hava limanı kimi Gəncəyə eniş edib.