Azərbaycanda media və yayım sahəsində yeni qurum yaradılır

Azərbaycanda Audiovizual Şuranın adı dəyişdirilərək Media və Yayım Şurası adlandırılacaq və qurumun səlahiyyətləri genişləndiriləcək. Bu, “Dövlət qulluğu haqqında” və “Media haqqında” qanunlara təklif edilən dəyişikliklərdə əksini tapıb.

Layihəyə əsasən, Şura media və yayım sahəsində səlahiyyətli dövlət orqanı olacaq. Qurum Media Reyestrini aparacaq, media subyektlərinə Media Reyestri şəhadətnaməsi, jurnalistlərə isə jurnalist vəsiqəsi verəcək.

Media subyektləri təsisçiləri, iştirakçıları və idarəetmə orqanının rəhbəri barədə məlumatı hər il dekabrın 30-dək Şuraya təqdim etməli olacaqlar.

Şuranın səlahiyyətlərinə media savadlılığının artırılması, media subyektlərinin iqtisadi müstəqilliyinin gücləndirilməsi, jurnalistlərin peşəkarlığının artırılması, müsabiqələrin və təlimlərin təşkili, eləcə də audiovizual məhsullar üzrə dövlət sifarişçisi kimi çıxış etmək daxil edilir.

Qanun layihəsində Şuraya dezinformasiyanın qarşısının alınması, sosial şəbəkələrdə rəqəmsal məzmunun təhlili və media subyektlərinin fəaliyyətinə dair araşdırmalar aparmaq səlahiyyəti də verilir.

Gülnar Nazimqızı