Bir həftə ərzində təmizlənən minalı ərazilərin həcmi açıqlanıb

Azərbaycanın işğaldan azad edilmiş ərazilərində iyunun 8-dən 15-dək aparılan humanitar minatəmizləmə əməliyyatları zamanı 22 tank əleyhinə mina, 29 piyada əleyhinə mina və 497 partlamamış hərbi sursat (PHS) aşkar edilərək zərərsizləşdirilib. Bu barədə Azərbaycan Respublikası Minatəmizləmə Agentliyinin (ANAMA) həftəlik məlumatında bildirilir.

Məlumata görə, hesabat dövründə ümumilikdə 1 668,8 hektar ərazi mina və partlamamış sursatlardan təmizlənib.

ANAMA-nın məlumatına əsasən, işğaldan azad olunmuş ərazilərdə son dörd il ərzində ümumilikdə 175 017 mina və partlamamış hərbi sursat zərərsizləşdirilib. Bunlardan 34 996-sı piyada əleyhinə mina, 21 022-si tank əleyhinə mina, 118 999-u isə partlamamış hərbi sursat olub.

Müharibədən sonrakı dövrdə ümumilikdə 176 237 hektar ərazi mina təhlükəsindən təmizlənib.

Azərbaycan işğaldan azad edilmiş ərazilərdə genişmiqyaslı humanitar minatəmizləmə əməliyyatları həyata keçirir. Rəsmi məlumatlara görə, ölkədə mina qurbanlarının sayı 3 400 nəfərdən çoxdur. Onlardan 359-u uşaq, 38-i isə qadındır. İkinci Qarabağ müharibəsindən sonra mina partlayışları nəticəsində 382 nəfər zərər çəkib, onlardan 55 nəfər həlak olub. Zərərçəkənlərin 143 nəfərini mülki şəxslər təşkil edir.

BMT-nin məlumatlarına görə, dünyada mina qurbanlarının 84%-i mülki şəxslərdir. Onların 37%-ni uşaqlar, 81%-ni isə kişilər və oğlan uşaqları təşkil edir. Mina təhlükəsi Azərbaycanın post-münaqişə dövründə üzləşdiyi əsas humanitar problemlərdən biri olaraq qalır.

Gülnar Nazimqızı