İİB: 57 üzv ölkədən 32-si həssas və ya yoxsul vəziyyətdədir

İslam İnkişaf Bankı (İİB) Qrupunun Əməliyyatlar üzrə vitse-prezidenti Rami Mahmud Ahmad bildirib ki, Bankın 57 üzv ölkəsindən 32-si hazırda həssas və ya yoxsul vəziyyətdədir.

O, bu barədə Bakıda keçirilən İslam İnkişaf Bankının İllik Toplantıları çərçivəsində təşkil olunan “İslam İnkişaf Bankının Dayanıqlılıq Dialoqu 2026: Yüksək Səviyyəli Panel Sessiyası”nda çıxışı zamanı deyib.

Onun sözlərinə görə, yaxın 10 ildə təxminən 400 milyon insanın həddindən artıq yoxsulluq şəraitində yaşayacağı gözlənilir. Rami Mahmud Ahmad qeyd edib ki, Sahel regionunda münaqişələr, iqlim şokları və ərzaq çatışmazlığı, Suriyada isə uzunmüddətli böhran həssaslığı artırır və inkişafı ləngidir.

Vitse-prezident bildirib ki, İİB-yə üzv ölkələrdən 27-si ən az inkişaf etmiş ölkələrdir. Bu səbəbdən dayanıqlılığa investisiya qoyuluşu və humanitar, inkişaf və sülh istiqamətlərini birləşdirən yanaşma xüsusi əhəmiyyət daşıyır.

O əlavə edib ki, İslam İnkişaf Bankı son beş ildə tərəfdaşları ilə birlikdə münaqişə və təbii fəlakətlərdən zərər çəkmiş 10 milyondan çox insana dəstək göstərib.

Aytac Zeynalova