Məktəblərdə müəllim və şagirdlər üçün geyim tələblərinin qanunla tənzimlənməsi I oxunuşda qəbul olunub

Azərbaycanda ümumi təhsil müəssisələrində müəllim və şagirdlərin geyim qaydalarının vahid yanaşma əsasında tənzimlənməsi təklif olunur.

Milli Məclisin Elm və təhsil komitəsinin üzvü Anar İsgəndərov bildirib ki, məsələ ilə bağlı qanun layihəsi komitədə müzakirə olunaraq plenar iclasa tövsiyə edilib.

Deputatın sözlərinə görə, təhsil mühitində vahid geyim yanaşmasının tətbiqi tədris prosesinə diqqətin artırılmasına və məktəblərdə nizam-intizamın gücləndirilməsinə xidmət edə bilər.

“Bu məsələdə tətbiq olunan yanaşmalar cəmiyyətin qəbul etdiyi etik davranış normaları, milli-mənəvi dəyərlər və müasir təhsil prinsipləri ilə uzlaşdırılmalıdır”, -  Anar İsgəndərov qeyd edib.

O bildirib ki, vahid məktəbli formasının tətbiqi sosial fərqlərin görünən təsirlərini azaltmaqla yanaşı, şagirdlər arasında ayrı-seçkilik risklərini də minimuma endirə bilər. 

Deputat qeyd edib ki, məktəb yalnız bilik verilən məkan deyil, həm də uşaqların sosial mühitə uyğunlaşdığı mühüm institutdur.

Qanun layihəsinə əsasən, “Ümumi təhsil haqqında” qanuna ediləcək dəyişikliklə dövlət ümumi təhsil müəssisələrində təhsil verən şəxslər üçün geyim tələblərinin müəyyən edilməsi nəzərdə tutulur. Bu tələblərin aidiyyəti icra hakimiyyəti orqanının müəyyən etdiyi qurum tərəfindən müəyyənləşdirilməsi təklif edilir.

Layihədə həmçinin şagirdlərin vahid məktəbli forması ilə bağlı müəyyən olunmuş tələblərə əməl etməsinin valideynlərin və ya digər qanuni nümayəndələrin vəzifəsi kimi müəyyən edilməsi təklif olunur.

Gülnar Nazimqızı