TƏBİB-in tabeliyindəki tibb müəssisələrində KT cihazlarının sayı 30-a düşüb

Hazırda ölkə üzrə TƏBİB-in tabeliyində fəaliyyət göstərən tibb müəssisələrində 30 ədəd kompüter tomoqrafiyası (KT) cihazı mövcuddur. Bu barədə anews.az-ın sorğusuna cavab olaraq TƏBİB-dən bildirilib. 

"KT cihazlarının 11-i Bakı şəhərində, 19-u isə regionlarda yerləşən tibb müəssisələrində fəaliyyət göstərir. Radioloji tibbi xidmətlərin təkmilləşdirilməsi məqsədilə müasir tibbi texnologiyaların tətbiqi istiqamətində tədbirlər davam etdirilir" - sorğuya cavabda deyilir. 

TƏBİB bildirir ki, əsas məqsəd bütün tibb müəssisələrinin radioloji avadanlıqlarla təchiz olunması deyil, pasiyentlərin radioloji xidmətlərə əlçatanlığının təmin edilməsi və vahid radioloji xidmət sisteminin formalaşdırılmasıdır.

Bununla yanaşı, TƏBİB-in 2025-ci ilin oktyabr ayında yerli mətbuatın sorğusuna verdiyi cavabda tabeliyində olan tibb müəssisələrində ümumilikdə 44 kompüter tomoqrafiyası cihazının mövcud olduğu bildirilmişdi.

Beləliklə, açıqlanan son rəqəmlər TƏBİB-in tabeliyindəki tibb müəssisələrində KT cihazlarının sayının əvvəlki məlumatla müqayisədə 14 vahid az olduğunu göstərir. Qurum tərəfindən bu fərqin səbəbləri ilə bağlı əlavə izahat verilməyib.

Gülnar Nazimqızı