Ali məktəblərin qabiliyyət tələb edən ixtisasları üzrə imtahanlar başlayıb

İyunun 22-dən Azərbaycanda ali təhsil müəssisələrinin xüsusi qabiliyyət tələb edən ixtisasları üzrə qabiliyyət imtahanlarına başlanılıb.Bu barədə Dövlət İmtahan Mərkəzi (DİM) məlumat yayıb.

DİM-in məlumatına görə, ilk imtahanlar Bakıdakı 286 nömrəli tam orta məktəbdə təsviri sənət istiqamətinin 15-ci (dekorativ-tətbiqi sənət), 189-190 nömrəli tam orta məktəbdə xoreoqrafiya sənəti istiqamətinin 53-cü və Tofiq Bəhramov adına Respublika Stadionunda idman istiqamətinin 62-ci komissiyaları üzrə keçirilir. İdman istiqaməti üzrə imtahanlar ümumi fiziki hazırlıq, kütləvi sağlamlaşdırıcı idman və adaptiv bədən tərbiyəsini əhatə edir.

Mərkəz bildirib ki, abituriyentlər və subbakalavrlar imtahana gələrkən şəxsiyyət vəsiqəsinin əslini və “Qabiliyyət imtahanına buraxılış vərəqəsi”ni təqdim etməlidirlər.

İdman istiqaməti üzrə imtahan iştirakçılarından idman geyimi və U086 formalı tibbi arayış, xoreoqrafiya sənəti ixtisasına müraciət edənlərdən isə rəqs geyimi və sağlamlıq haqqında tibbi arayış tələb olunur.

DİM həmçinin qeyd edib ki, mobil telefonda saxlanılan musiqi fayllarının imtahan binasına gətirilməsinə icazə verilmir. Abituriyentlər musiqi fayllarını fləşkart və ya diskdə təqdim etməlidirlər və faylların texniki yararlılığına görə özləri məsuliyyət daşıyırlar.

Qurum abituriyentlərə qəbul olmaq istədikləri ixtisaslara uyğun proqramlarla əvvəlcədən tanış olmağı tövsiyə edib. Qabiliyyət imtahanlarının qrafikinin mütəmadi yeniləndiyi və yeni tarixlərin müəyyənləşdikcə cədvələ əlavə ediləcəyi bildirilib.