İstanbuldakı Azərbaycan bağçasında uşaqlara qarşı zorakılıq iddiası - video

Türkiyənin İstanbul şəhərində fəaliyyət göstərən “Hüseyn Cavid Azərbaycan Millətlərarası Uşaq Bağçası”nda uşaqlara qarşı zorakılıq göstərilməsi ilə bağlı iddialar yayılıb. 

Türkiyə mediasının məlumatına görə, İstanbulun Bayrampaşa rayonunda yerləşən və əsasən əcnəbi vətəndaşların uşaqlarının təhsil aldığı özəl bağçada çalışan 60 yaşlı A.B. adlı əməkdaşın uşaqları yuxu saatında ağac çubuqla vurduğu və onlara qarşı kobud rəftar etdiyi iddia olunur.

Məlumata əsasən, hadisələrin təhlükəsizlik kameralarına düşməsindən sonra Türkiyənin Ailə və Sosial Xidmətlər Nazirliyi araşdırmaya başlayıb. Şübhəli şəxs saxlanılıb və məhkəmə qarşısına çıxarılıb.

Bildirilir ki, bağçada narazılığa səbəb olan hadisələr iyunun 16, 17 və 19-da baş verib. İddialar valideynlərin və müəssisə rəhbərliyinin vəziyyətdən xəbər tutmasından sonra üzə çıxıb.

Məlumata görə, “Hüseyn Cavid Azərbaycan Millətlərarası Uşaq Bağçası” 2016-cı ildə filologiya üzrə fəlsəfə doktoru Şərqiyyə Məmmədova tərəfindən təsis edilib. O, əvvəlcə İstanbulda yaşayan azərbaycanlı uşaqların təhsilə cəlb olunması məqsədilə “Azərbaycan Təhsil-Kültür və Sosial Dayanışma Dərnəyi”ni yaradıb, daha sonra dərnəyin nəzdində məktəb və bağça fəaliyyətə başlayıb.

Rəsmi məlumatlara görə, müəssisədə təhsil alan uşaqların əksəriyyəti müxtəlif illərdə Türkiyəyə köçmüş, sənədləşmə və sosial problemlərlə üzləşən azərbaycanlı ailələrin övladlarıdır. Layihənin əsas məqsədlərindən biri uşaqların Azərbaycan dili, tarixi və mədəniyyəti ilə bağlı biliklərinin qorunmasıdır.

Bağçanın sponsorunun azərbaycanlı iş adamı Anar Əlzadə olduğu bildirilir. 

Hadisə ilə bağlı araşdırmalar davam edir.