Azərbaycan hərbçiləri Konyada “Anadolu Qartalı - 2026” beynəlxalq təlimində iştirak edir - Video

Azərbaycan hərbçiləri Türkiyənin Konya şəhərində yerləşən aviabazada keçirilən “Anadolu Qartalı-2026” beynəlxalq taktiki-uçuş təlimində iştirak edir.Bu barədə Azərbaycan Müdafiə Nazirliyindən məlumat verilib.

Təlimə Azərbaycan Hərbi Hava Qüvvələrinin uçuş və texniki heyəti, həmçinin Sukhoi Su-25 hücum təyyarələri cəlb olunub. 

Məlumata görə, iştirakçılara təlimin məqsədi, keçiriləcəyi ərazi, müxtəlif mərhələlər üzrə icra olunacaq tapşırıqlar və təhlükəsizlik qaydaları barədə brifinq təqdim edilib.

Nazirlik bildirib ki, Azərbaycan pilotları təlim planına uyğun olaraq qarşıya qoyulan tapşırıqları yerinə yetirib.

“Anadolu Qartalı-2026” təliminin əsas məqsədi iştirakçı ölkələrin hərbi hava qüvvələri arasında əməkdaşlığın inkişaf etdirilməsi, təcrübə mübadiləsinin aparılması və birgə əməliyyat imkanlarının genişləndirilməsidir.