Azərbaycanlı rəssam Rəfiq Əziz dünya rekordçusu elan edilib

Azərbaycanlı rəssam və professor Rəfiq Əziz “Geniuses World Record Association” tərəfindən dünya rekordçusu elan edilib.

Təşkilatın təqdim etdiyi sertifikata əsasən, Əziz Türkiyə muzeylərində 154 yağlı boya əsəri nümayiş olunan və yaradıcılığına görə Türkiyə Milli Zərbxanası tərəfindən üç xatirə gümüş sikkəsi zərb edilən ilk müasir azərbaycanlı rəssam kimi rekorda layiq görülüb.

Uzun illərdir Türkiyədə yaşayan və fəaliyyət göstərən Əziz 20 ildən artıqdır Türkiyə Hərbi Dəniz Qüvvələri Komandanlığının baş rəssamı kimi çalışır. O, həmçinin İstanbul Yeditepe Universitetində professor kimi pedaqoji fəaliyyət göstərir.

Rəssamın əsərləri Türkiyənin hərbi və dövlət muzeylərində, habelə müxtəlif ölkələrdə muzey və şəxsi kolleksiyalarda saxlanılır.

Sertifikat 2016-cı il noyabrın 1-də təqdim olunub.