Samuxda baş vermiş qəza nəticəsində DSX-nin hərbi qulluqçusu həlak olub - Yenilənib

Dövlət Sərhəd Xidmətinin (DSX) hərbi qulluqçusu Samux rayonunda baş vermiş yol-nəqliyyat hadisəsi nəticəsində həlak olub.

DSX-nin məlumatına görə, hadisə iyulun 1-də baş verib. Sərhəd Qoşunlarının hərbi qulluqçusu, kiçik gizir Vüsal Zabil oğlu Nəzərovun olduğu avtomobil idarəetmədən çıxaraq çay yatağına düşüb.

Qurum bildirib ki, məlumat daxil olduqdan sonra DSX və Fövqəladə Hallar Nazirliyinin əməkdaşları hadisə yerində axtarış-xilasetmə əməliyyatı aparıblar. Əməliyyat nəticəsində hərbi qulluqçunun meyiti aşkar olunub.

***

Samux rayonunda ölümlə nəticələnən yol-nəqliyyat hadisəsi baş verib.

Qafqazinfo-nun məlumatına görə, hadisə Mingəçevir Su Anbarının Samux rayonu ərazisindən keçən hissəsində qeydə alınıb. İlkin məlumata əsasən, "MAZ" markalı yük avtomobili aşıb. Nəticədə bir nəfər suda boğularaq ölüb, daha iki nəfər isə sudan çıxa bilib.

Həlak olan şəxsin Dövlət Sərhəd Xidmətinin əməkdaşı olduğu ehtimal edilir. 

Faktla bağlı araşdırma aparılır.