Azərbaycanda bağçalara elektron qəbul iyulun 7-dən başlayır

Azərbaycanda 2026–2027-ci tədris ili üzrə məktəbəqədər təhsil müəssisələrinə uşaqların elektron qəbulu prosesinə iyulun 7-dən başlanılacaq. Bu barədə Elm və Təhsil Nazirliyi məlumat yayıb.

Məlumata görə, iyulun 7-si saat 11:00-dan etibarən Regional Təhsil İdarələri və Naxçıvan Muxtar Respublikasının tabeliyində olan məktəbəqədər təhsil müəssisələrinə, iyulun 9-u saat 11:00-dan isə Bakı şəhərindəki məktəbəqədər təhsil müəssisələrinə qəbul üçün elektron növbələrin yaradılması açılacaq.

Nazirlik bildirib ki, 2021 və 2022-ci il təvəllüdlü uşaqlar üçün növbələr saat 11:00-da, 2023, 2024 və 2025-ci il təvəllüdlü uşaqlar üçün isə saat 15:00-da aktivləşdiriləcək.

Bu il ilk dəfə qəbul prosesi "myGov" platforması üzərindən həyata keçiriləcək. Valideynlər və ya qanuni nümayəndələr "myGov" kabinetində "Xidmətlər" bölməsindən Elm və Təhsil Nazirliyinin "Məktəbəqədər təhsil müəssisələrinə qəbul" xidmətini seçərək elektron müraciət edə biləcəklər.

Qəbul qaydalarına əsasən, bir uşaq üçün maksimum üç məktəbəqədər təhsil müəssisəsi seçilə bilər. Yaradılan növbə boş yer olduğu halda minimum beş gündən sonra sorğuya çevriləcək. Sorğu yaradıldıqdan sonra valideynlər yeddi gün ərzində tələb olunan sənədləri müvafiq təhsil müəssisəsinə təqdim etməlidirlər. Bu müddətdə sənədlər təqdim edilmədiyi halda sorğu ləğv ediləcək və növbə digər uşağa keçəcək.

Nazirlik əlavə edib ki, ötən tədris ilində yaradılmış növbə və sorğular arxivləşdirilərək valideyn kabinetinə əlavə edilib və onlar 2026–2027-ci tədris ili üzrə qəbul prosesində etibarlı hesab olunmayacaq.